雞泡膠燉湯

上回講到學人進補的小師奶，經過重重難關後，終於成功把「雙花」燉盅帶到返屋企！究竟勞師動眾，要燉咩巴閉呢？就係呢個"雞泡魚膠燉湯"！

《 傳統以來，脹氣的魚肚都有調理女性生理腑臟之效，由名貴的蜘蛛肚到平民的雞泡膠。而今次介紹的雞泡膠，有調理女性子宮作用。》

材料：雞泡膠2隻、白蓮1両、百合1両、元肉1両、瘦肉4両、四碗水

做法：
1）白蓮、百合、元肉浸水備用。
2）瘦肉汆水備用。
3）雞泡膠浸發後，汆水10分鐘備用。
4）將所有材料清燉2小時即成。

我個人喜歡清淡，所以無加瑤柱/金華火腿，湯味清清甜甜咁！燉起左，大約有三大碗的份量，自己趁熱飲左一大碗，也醒左一碗多渣的比老公飲，仲有一大碗連渣的可以留返第二日再飲！

食療話最好一星期食兩次，不過工作繁忙，夜晚燉好又太夜食，所以盡量希望最少一星期一次或者兩星期三次啦！

南棗蘋果茶

最近天氣潮濕，加上工作繁忙，身體真係相堂勞累！若睡眠不足就肯定更加擾人，好彩個日去開海味舖時，太子哥仔醒左條方比我，等我做返個安睡寶寶啦！

南棗益腸胃，補腎養肝、安神養心。氣血不足睡不好時，煮南棗茶飲最好。

南棗蘋果茶
材料：
南棗8-10粒
蘋果2個
杞子30克
藍莓乾10克
水1.5 L

做法：
1.把材料洗淨
2.蘋果去芯切大粒
3.南棗切開(經驗所得：起初以為就咁用刀劈開南棗兩半就得，點知原來中間有堅硬大核，所以用刀沿核把部分肉切出來，讓它更出味)
4.落所有材料，大火滾起後，慢火煲30分鐘

煲好攤凍後，可注入1L的膠樽，約為四碗的份量; 每天晚飯後可返熱一碗，趁暖時候飲，酸酸甜甜，味道不錯！

開始補補-燉盅篇

小師奶學人去進補，想話燉返D野食下，入門當然係要買個燉盅啦！時間緊迫，就響實惠度買個平平地的用下就得啦！

尋晚漏夜買左舊薑，今朝又一早騰出去買左瘦肉，萬事俱備，咁就可以開工啦！當我處理好哂所有野，正準備插電開始燉的時候，竟然發現面頭個膠蓋係蓋唔實，兩邊搖搖下咁...點算呀???(嗚嗚嗚~~~冷靜!!!)拿拿臨打返去舖頭問下點解決，sales姐姐亦發現原來除左個display，其他新貨都有同樣問題，於是佢就將display度個燉盅蓋換左比我啦！(呼~~~好彩!!!)

返黎終於都可以開始燉啦！(yeah~~~yeah~~~yeah~~~)

點知，插好電、set好哂時間就發現，OH....d瘦肉唔記得出水添！哎呀~~~我呢d煮人，點會犯呢d低級錯誤架?! 算啦！呢個影響唔大，照去嚕~~~~~

兩個鐘頭後，香噴噴的「雞泡膠燉湯」終於做好啦!!!!!!

咦?! 原來燉完d水無咩少到喎，咁好啦，益埋老公一齊飲啦！

同埸加映~~~~~~~南棗蘋果茶!!!

寧神靜心的安眠茶，應付下星期忙碌的一週！

愛whatsapp之無無聊

外向且愛說話的我， 煲電話粥我當然在行， 但就很少主動打電話給朋友聊天，總覺得無咩特別主題、無端端又唔知點樣打開個話匣子咁，感覺真係好怪！即使有時心底裡好想關心d老人家，知道係要打個電話去關心佢地，我都比較少做。

但凡事都有例外...還記得當時爸爸留醫時，每天我都會打電話給他，即使每次都只是重覆著差不多的內容：在做什麼？吃了東西未？吃了些什麼？今天的身體好嗎？感覺如何？每次的對談中就是希望聽到爸爸的回應和笑聲，我就覺得安心了！而這份“每天必須聽到對方聲音”的心動，即使在戀愛時也未曾有過的衝動，讓我在爸爸返回天家後有著不言而喻的滿足！我真的感恩自己當時有機會、有感動去這樣做...

在通訊上，我是一個很喜歡發短訊的人，特別在談戀愛時，好友同事每每在上班前看到我在“作文”，而老公也當然收了我不少我的大作啦！

從前還在SMS的年代，我已是不顧一切的發短訊(那就是每個月要負比電話月費還要貴的短訊費用)，總覺得既然錢是比了，當然要用盡可說話的空間，所以自然地就會寫寫寫...

走到whatsapp的世界裡，除了文字，還有圖片、照片、檔案、錄音、錄像等，我最喜歡就是用照片/圖片去分享生活，所以我愛whatsapp，它讓我在不用額外付費下，盡情地以不同的方式與身邊人通訊。

無無聊時可傳一個圖案去表達心情，可以拍下有趣的東西和人分享，看到有意思的quote又可和朋友討論，更重要是，它讓我更輕易地向身邊人表達我的關懷及愛心！

那天心血來潮地拍下在電視看到的翻播舊劇，就與姐姐討論了一輪，很無聊，但卻覺得彼此...靠近了！

對老婆說最多的話

智能電話的盛行，的確係有好有壞，眼前身邊人(包括自己)都有不同程度的上癮：check facebook、上網、打機、whatsapp、wechat、影相、執相、寫blog，真係「一機在手，就世界我有」咁誇張！

熱愛打機的老公，實在係機不離手；所以漸漸地我們之間也有了協議，在食飯期間不可打機，也盡量做到連whatsapp/電話通訊都暫停，好讓大家可以專心食飯，把握機會讓二人好好的交流生活！

不過在其餘的時間，老公還是喜愛打機，還要我也一起玩，好讓我可以幫忙把遊戲內的“命”傳送給他！我還笑問他：「你知不知道你最近對我最常說的話是什麼呢？就是“俾命”呀！」他但笑不語，似乎非常認同。

老公大人，兩夫妻之間說最多的應該是「我愛你」呀，唔好俾打機嘅語言取代左最重要的love language呀！(當然，響鬧佢之餘，我都係要乖乖地努力俾命佢~~~-_-”)

註：老公都是常對我說「我愛你」的人，所以響呢段他沉迷“索命”的時段，我都會原諒他的！嘻~

重溫《Sex and the city 2》

一直係Sex and the city的忠實fans，由從前的電視劇，到買碟翻煲返電視劇，到走進大銀幕時，第一時間買飛去睇，到今日已經係買碟再翻煲第二集的電影，數下都有十多個年頭嚕！

呢4個女生，陪住我同一眾姊妹嘅成長，睇住佢地嘅經歷，雖然間中係dramatic左少少，但大部分其實都係好down-to-earth的少女情懷，實在有太多令我地有感動的畫面！

十年人事，姊妹們的際遇各有不同：

如Charlotte的姊妹，以家庭為重，有著一仔一女，滿足地為孩子們打拼！

如Miranda的姊妹，剛結束了一段感情，堅強而性格爽朗的她，豪邁地揮別過去，面對著新朋友、新環境，重新再活過更愛自己、更愛家人的生活！I'm so proud of her!

如Samantha的姊妹，經過不同的感情經歷後，並未有對愛情失去信心，終於在天父安排的緣份下找到了真愛，準備當一個幸福的新娘！

而像Carrie那般多愁善感的我，經過一輪又一輪的drama後，思前想後，終於嫁左比我的Mr.Big，響“Me and you, just us two”的二人世界裡，過住忙碌但甜蜜愉快的小師奶生活！但是，跟Carrie所不同的，我和Mr.Big的世界裡，希望不止兩人吧！嘻嘻~~~(大家請勿誤會，現在還是二人啦！)

婚後3個月，再重溫她們的故事，細味當中的對白，感覺很不同，也對關係和婚姻有更深的體會！ ((一路睇，好多個位，都有會心的微笑、傻笑或感動...that's US! My SATC gals, I missed you~))  

新不如舊

一向愛食西式brunch的我，Egg Benedict更加係我的最愛！

尋日去左旺角的18 GRAMS度食，其他配菜係幾唔錯，尤其係個雜菜沙律，新鮮的菜加埋酸酸的汁，好開胃丫！

可惜，個主菜，即係個Egg Benedict就麻麻地！響蛋上面個pat醬，個味好似唔知點咁，又杰身、又漿口， 真係想撥開佢就算；不過下面個包烘到少少脆，咁食落個口感都加返分！

Vegetarian Egg Benedict ($79)

 

Vanilla Latte ($36)

旺角登打士街56號家樂坊地庫B04號舖

食完呢個之後，真係好掛住我食開個間Brunch Club呀！

睇黎都要搵返日過去探下benedict兄先得~~~~~

《西遊記·大鬧天宮》- 有驚喜的賀歲片

難得好友G於新年期間放假兼約到，派利是比佢之餘，都要同佢睇返場戲。

響無咩要求下，揀左呢套《西遊記‧大鬧天宮》。除左再捧發哥的場(因為初二已經睇左《賭城風雲》)，睇落D卡士都幾勁，主角仲有郭富城同甄子丹。

雖然個故事就熟到爛，但出奇地比個3D效果吸引住，d對白亦幾搞笑！我形容呢套為巨星+特技+大製作+天空之城feel的西遊記，2個鐘頭都無咩悶場！

不過睇完就係以下無聊疑問：

1. 點解呢個玉帝咁靚仔有型，仲要自己出戰埋咁勇﹖最重要係，咁多對白既﹖

(通常玉帝都係阿伯一名，得幾個鏡頭+兩句對白之嘛！)

因為佢係周潤發嘛!!!

 

2. 點解呢個牛魔王又係咁靚仔有型﹖最重要係，點解佢唔駛撐大個鼻哥loan扮牛牛﹖

因為佢係郭富城囉!!!  

比我最大的驚喜係呢2位靚女：

出場唔夠3分鐘的女媧，佢出場好似跳住舞咁補天，好靚好靚呀!!!! 

呢個小狐仙，個樣好標緻，好可愛！ 

年初三，赤口-宜開局

 

 

呢個係爸爸返左天家後的第二個新年，無左以前熱熱鬧鬧咁呢度去、個度去拜年，氣氛好似冷清左好多；但今日響小屋度，一家六口圍埋響度開左個細細嘅賭局，大家玩到笑爆哂肚咁，好耐無見阿媽笑得咁開懷.......如果爸爸都響度，相信會更熱鬧，因為呢個傻爸一定係更搞笑！不過，知道你響天家都有陪住我地，同樣咁enjoy我地嘅笑聲！

 

三公緊丫，攞住9點就穩陣啦~~~~~~

 

 

呢張檯真係好旺21點呀!!!!!!!!!!!!!!!!!不過而家仲係玩緊三公喎！