虛驚一場

早兩晚10點幾瞓落床，都未唱good night song，BB已經靜英英，輕輕拍佢幾下都係無動靜，阿媽當堂嚇到鼻哥窿都無肉....跟住響床度係咁典，專登打側瞓黎夾住佢，居然都無動靜(平時打側夾住佢，佢會狂毆我個肚皮)！好，等我坐起身冷靜下再叫，都無動靜...

驚到阿媽喊完一輪、反胃、去廁所嘔埋，返埋床再冷靜，至感覺到佢細細力郁左一下咁多...之後再左拍右拍下佢，佢至郁多幾下細嘅應酬下阿媽...有無瞓得咁稔呀？！嚇死阿媽咩！！！

第二朝同姊妹分享，梗係比人笑我太緊張啦！連我老公都話我係想撒嬌囉....做過阿媽嘅都知，BB響你肚入面郁唔郁、郁幾多、幾時郁、點樣郁，真係你兩個至知，其他人又點會理解到當中嘅奧妙呢？！好彩，驚完個晚之後，BB第日開始就郁返夠本，可能係之前有幾晚太夜唔瞓，令到BB太攰啦！

進入22週，佢開始郁得巧活潑了！