告別大西北

說好的「大西北遷徙之旅」終於在昨天完成了！早在二月已經決定住到四月會離開，隨著日子一天一天迫近，執屋的工作更是迫在眉睫；雖說孕婦不應該太操勞，但男人對家裡的東東又知多少呢？加上，他們執屋的“方式”真是男女大不同，勉強要他們幫忙，都是俾機會去激死自己，唯有事事親力親為吧！

這間小屋，住了兩年半了！當日在訂婚後決定兩口子搬出來住，從決定搬到搵樓到睇樓到決定租到買傢俬到搬入去住，都只是一個星期的事！當時這個新建成的單位，雖說屋仔細細，但既實用又新淨的特質確實是很吸引。屋內的所有傢俬物品都是我們親自買回來及裝飾，這個小天地就滿載了我們婚前婚後的美好回憶！

今天，為了快將出世的女兒，我們決定要離開這裡了！搬回娘家跟家人一起住的決定並不容易，對老公更是為難的決定，但為了女兒有好的成長環境和照顧，我們還是選擇了犧牲！相信天下間所有父母都會這樣為自己的兒女...

後記：男人執野搬屋真的很恐怖～

老公可以把雜物“求其”掃進一個紙袋後交給你再跟進...負責拆電腦兄弟，可以連塵連垃圾連線一起pack進紙箱內...

2/3路程上的媽媽感言

 

踏入26週，奇妙旅程已經走了2/3的路程了!感恩在這差不多四個月的蜜月期裡，我沒有什麽大不適，雖然間中也要應付擾人的小毛病，但絕大部份時間我都跟BB快樂地共處！

在工作的環境中，同事都視我為一個“活潑的”大肚婆，因為除了肚子日益脹大外，我的步姿、步速和處理學生的肉緊程度都沒有改變，仍是快、狠、準，一招攞命的！這點我覺得很好丫，因為這代表了我的身體很好，這要多得師父仔多年來對我的調養；另外，我也感恩BB經常都很合作，跟媽媽一起睡，睡得比較晚才起來郁動，對媽媽的生活沒有太大的影響。

最近一個月的胎動已經加密了很多，尤其是在黃昏、晚飯的時間左右，她會連續多次的郁動，而且力量也比較大；起初以為她在耍拳，後來看資料才知道她應該在打嗝，因為比較有節奏地持續數分鐘。每次靜下來感受她的郁動，除了覺得神妙外，也會在想像她正在我的肚皮裡做什麼；摸摸她、拍拍她，她又好像跟你在溝通一樣回應，可愛極了！

走到這裡，心裡有著矛盾的感覺：一方面當然想把這個寶貝捧在懷裡親，但另一方面又有點害怕會應付不了BB出世後的忙碌生活，更重要是，我覺得現在這樣“母體相連”的親密感覺真的很特別，很不願捨棄哩！

BB，你現在已經可以聽到和認到媽媽的聲音了！希望你會是一個健康、快樂和充滿愛的寶寶！媽媽和爸爸都很愛你，期待和你見面的一天！

虛驚一場

早兩晚10點幾瞓落床，都未唱good night song，BB已經靜英英，輕輕拍佢幾下都係無動靜，阿媽當堂嚇到鼻哥窿都無肉....跟住響床度係咁典，專登打側瞓黎夾住佢，居然都無動靜(平時打側夾住佢，佢會狂毆我個肚皮)！好，等我坐起身冷靜下再叫，都無動靜...

驚到阿媽喊完一輪、反胃、去廁所嘔埋，返埋床再冷靜，至感覺到佢細細力郁左一下咁多...之後再左拍右拍下佢，佢至郁多幾下細嘅應酬下阿媽...有無瞓得咁稔呀？！嚇死阿媽咩！！！

第二朝同姊妹分享，梗係比人笑我太緊張啦！連我老公都話我係想撒嬌囉....做過阿媽嘅都知，BB響你肚入面郁唔郁、郁幾多、幾時郁、點樣郁，真係你兩個至知，其他人又點會理解到當中嘅奧妙呢？！好彩，驚完個晚之後，BB第日開始就郁返夠本，可能係之前有幾晚太夜唔瞓，令到BB太攰啦！

進入22週，佢開始郁得巧活潑了！

大考過關了～

在懷孕的過程中，有兩個考試是很重要：一個係響3個月要做的Oscar，即是度頸皮，檢測胎兒患有唐氏綜合症的可能性。醫生會根據響超聲波度做度頸皮厚度的結果，加埋媽媽的年齡同驗血嘅結果去計算風險，當時BB以低風險過左關，媽媽就好安樂啦！

來到5個月，BB又要參加考試，而且呢次仲係中期大考，就是做structure，即是照結構，了解BB發展到5個月的“頭腦手腳心肝脾肺腎血管”等係咪已經有左正常的發展！經過很有經驗的林醫生帶我地走左一趟大型的「畢卡索奇幻之旅」(即醫生響mon度睇到、同你介紹的身體部分，你睇到d、又睇唔到d咁，好似國王的新衣咁囉~)，最重要係得出結論係：一。切。正。常。！咁阿媽又安樂哂啦～

同場林醫生仲送左張4D相比我地，影到BB嘅大部份面仔；雖然而家嘅輪廓都係一pat野咁，但睇住呢個就係我個BB，媽媽心裡還是巧感動喔！！！

與玉鈪暫別了～

進入了第21週，這兩週肚子變大了很多，好像吹漲了！未懷孕前右手上一直戴著玉鈪，好友在我得知懷孕後已提醒我要在適當時候把玉鈪，否則到入醫院生BB時，若玉鈪不能夠順利除下來，就要敲碎它了！這兩週發現手腕隨著肚子變大也變肥了，於是就決心要把玉鈪除下來，好好放好！(除下來的時候已經需要梘液的輔助，看來現在已是最好的時候～)

這隻玉鈪價值不便宜，原本知道價錢時我並不準備購買，因為真的太貴了！但當我看到實物，戴了上手上，感覺很好，就自然地拿信用咭出來付款了！我相信，千金難買心頭好......

希望在生B後，玉鈪又可以回歸我的手上！

2.5人世界的情人節

奇妙旅程已走到一半了，適逢今年的情人節，就帶住半個我老公的「前世情人」一齊慶祝！

平日都係自訂禮物的我，今年都揀左隻手錶，可惜訂購需時，響情人節就未有禮物到手！但老公居然主動買左小禮物比我，從來只著重心意嘅我，當然唔介意平貴，最緊要係老公有心，所以小小禮物我都一樣開心！

至於送比實際型嘅老公，一向都係衫褲鞋襪，今年佢無咩特別需要，咁當然就係送佢嘅最愛~美珍香的豬肉乾！

兩個人，帶著肚裡的小情人，去左睇戲，然後去飯堂食左餐老闆同老闆娘精心為我地預備的大餐！食到最後，已經肚飽得已能吃掉半碗的泡飯；但不消一會後，那個「度身訂做」的心型芒果布甸又比我同老公食哂嚕！

早早的吃飽飽，老公拖著我和小情人回家了；簡單的一個情人節，過得很快樂！

Baby的第一個紅封包

今日學校做團拜，點少得校監大人派返封吉祥大利是比我地；校監響我地個枱，第一個就派左比我，點知派左一個圈之後，居然忘記左個開始，又想埋黎再派比我！我講笑話：我拎左啦，雖然我有兩個(指住個肚肚)；校監話：咁就要派多封啦！

哈哈，佢呢個老人家真係好可愛，平時好關心學校嘅事務，大時大節又會黎同我地慶祝，請我地食野，關心下我地！

多謝校監為BB送上左第一份珍貴嘅祝福！

I can feel you~

進入第20週，呢個奇妙嘅旅程差唔多走到一半；呢個月係最舒服嘅一個月，身體無咩不適，行得、走得、食得、瞓得，間中追下車都仲得，哈哈！去到呢段時間，也亦應該係可以感受到胎動嘅時候，所以我每晚臨瞓前同BB傾計，都會feel下佢有無同我打招呼咁！

當然，最驚天地、泣鬼神嘅胎動係你做做下野突然感覺到有人punch你個肚皮，但事實上第一胎嘅大動作起碼要到20-21週至會出現，而呢兩個星期，應該會出現d“咕嚕咕嚕”嘅狀態，而媽媽應該可以分到係到底係肚餓、肚痛、要痾poo poo還是係BB嘅郁動！睇書話BB而家響肚入面就最歎，因為佢size仲細，但空間大和羊水多，所以其實佢而家已經好奔放咁響肚入面伸展，一陣游下水、一陣又耍下拳咁。

而我，呢個星期靜落黎嘅時候，可能響坐車/睇電視/瞓覺時，就會出現“咕嚕咕嚕”嘅感覺，經我觀察後，呢d就係BB豬郁動嘅聲音！呢d咕嚕會響肚入面不同嘅位置出現，每次出現，我會輕輕篤下佢，問係咪佢郁緊，通常佢都扮無野，跟住又響第二個位郁過，好得意！

同為大肚的同事已經27週，當然係胎動頻繁嘅時候，我同佢分享呢d咕嚕咕嚕，佢話你而家就最好，到佢打到出肚皮，你想佢停下都難，想安樂瞓一覺到天光都係奢望！哈，希望我的BB同我一樣都係愛睡寶寶，咁大家都有優質嘅睡眠啦！

執到平野~

女人最鍾意執到平野，尤其係開支甚多嘅媽媽們；一早已決定要買high chair，但全新嘅最優惠都要2000幾蚊，加上而家網上嘅二手巿場又大又多選擇，諗起“一闊三大”嘅我最終都向二手巿場埋手！

經過幾日幾夜嘅努力，終於比我以半價買到張95%新淨嘅high chair返黎；雖然要去到“山卡拉”咁遠嘅堅尼地城交收，但賣家好細心咁為我地預備左大膠袋同尼龍繩紮住張櫈，等我地拎得無咁“呢hea”，仲用優惠價賣多張全新嘅high chair cushion比我，咁換左落張櫈就幾乎係全新啦！哈哈，第一次買二手野就係happy trade，我又要繼續happy second-hand hunting先！

 同場加映，同事報料響德福的Piago(UNY集團)見到我心儀的NUK消毒奶煲有優惠，$688仲送兩大兩小嘅NUK PP印花奶樽，開心死我啦！去到同事又介紹，買左幾套佢試過質料唔錯嘅家居衫同埋uniqlo季尾嘅減價保暖衫仔，好抵丫！

所以哩，女人唔係剩係shopping，最緊要仲係shop得精明！！！

我愛的11月

經歷了十月份的高高低低，眨眼間就來到了我最愛的十一月！不僅是因為這是我生日的月份，也是我喜愛的秋份了！

感動的一刻，我看到了！

期待更多讓人歡喜快樂的時刻......